"Time" dokumentalaren kritika

2021eko Oscarren dokumental onenaren sarirako izendatua izan da eta jada postua eskuratzeko faboritoa bihurtu da.

Sinopsia: Fox Rich borrokalaria, ekintzailea eta sei haurren ama da, eta azken bi hamarkadetan bere senarra kartzeletik askatzeko kanpaina egin du.

Kritika: Asko gustatu zait filma, jendeak esaten duen bezain ona da eta testuinguru honetan oso garrantzitsua da publikoak benetazko istorioak eta borrokak jakitea.

Ikuspuntu tekniko batetik nahiko harrigarria da dokumental bat izateko.

Kamera-mugimenduek (esanahiz eta emozioz beteak bezain sotilak), plano bakoitzaren posizioak eta edizio bikainak, protagonista indartsu eta irmoak bizi duen egoerarekin bat datozen metafora bisualak sortzeko balio dute.

Denbora, lanaren izenburuak ondo adierazten duen bezala, oso presente dago isilune luzeetan, etxeko bideoetan eta espazioa kokatzen duten planoetan (horien osaera ere paregabea baita). Horrek batzuetan denbora motelegi igarotzen dela sentiarazten du, baina nire ustez hori dela bere helburua.

AEBko sistema penalaren aurkako salaketa argia da erretratatutako istorioa. Sistema horrek daukan arrazakeria eta klasismoari salaketa, eta, bereziki, nola eragiten dion familia bati batuta egon arren osorik ez egoteak. Kaltetuek beren egoera argitara ateratzeko eta konpontzeko borroka egiteko egiten duten ahalegina mirespenez eta errespetuz betetzen da.

Horregatik guztiagatik, beste dokumentalak ikusi ez ditudan arren, 2021eko Oscarretan saria irabazteko aukera asko dituen obra da.

Nota: 9/10

Amazon Prime Videon aurkitu daiteke dokumentala, hango originala baita.

Julia Rodriguez Amunarriz